Onyń ashylý saltanatynda oblys ákiminiń orynbasary Anton Fedıaev, tótenshe jaǵdaılar departamentiniń basshysy Ramıl Kamalov sóz sóılep, qatysýshylarǵa sáttilik tiledi.
Qazaqstan Respýblıkasynda tuńǵysh ret órtke qarsy qyzmettiń 100 jyldyǵyna arnalǵan fýnksıonaldy órt kópsaıysy boıynsha alǵash ret uıymdastyrylǵan aımaqaralyq chempıonattyń baǵdarlamasy sheńberinde 13 kúshtik jattyǵýlar, onyń ishinde bir qolmen salmaǵy 24 kılo tartatyn girdi kóterý, júgirý, qysymdy órt sóndirý shlangilerimen jalǵastyrý, gaz ballondaryn tasymaldaý, tipti arqanǵa baılanǵan avtomobıldi 50 metrge deıin qozǵaltý sekildi kúrdeli mindetter oryndaldy. О́z komandalaryn qyzý qoldaǵan jankúıerler LED ekrany arqyly órt sóndirýshiler men qutqarýshylar jaıly beınerolıkterdi tamashalady. Balalar arasynda azamattyq qorǵaý taqyrybyna arnalǵan vıktorınalar oınaldy.
О́rt sóndirýshiler arasyndaǵy jekelegen syndar qorytyndysynda Qostanaı oblysynyń ókili Dmıtrıı Balasko jeńimpaz atandy. Ekinshi oryndy Soltústik Qazaqstan oblysynyń ókili Rýslan Mustafın ıelendi. Komandalar boıynsha alań ıeleri jeńistiń eń bıik tuǵyryna kóterildi. Ekinshi, úshinshi oryndardy qostanaılyqtar men astanalyqtar bólisti.
О́mir Esqalı,
«Egemen Qazaqstan»
Soltústik Qazaqstan oblysy
